୯ଟି ଟ୍ରକ୍‌, ଗୋଟିଏ ଜେସିବି ସହ ୨୮୦ ଟନ୍‌ରୁ ଅଧିକ ପରିମାଣର ହାର୍ଡକୋକ୍‌ ଜବତ କରାଯାଇଛି

BBSR Reporters

ଚୌଦ୍ବାର : ରାଜ୍ୟ କ୍ରାଇମବ୍ରାଞ୍ଚର ଏସଟିଏଫ ଟିମ ଗତକାଲି ଗୁରୁଡିଝାଟିଆ ଥାନା ଅନ୍ତର୍ଗତ ବଉଳ ଓ ଚୌଦ୍ୱାର ଥାନା ଅନ୍ତର୍ଗତ ନୂଆପାଟଣା ଠାରେ ଚଢାଉ କରି ପ୍ରାୟ ୧ କୋଟି ଟଙ୍କାର ହାଡ୍‌କୋକ୍‌ ଜବତ କରିଛି। ଏହି ଚୋରା କାରବାରର ମାଷ୍ଟରମାଇଣ୍ଡ ଫେରାର୍‌ ହୋଇ ଯାଇଛି। କାଲି ଅପରାହ୍ନ ପ୍ରାୟ ୧୨ଟା ବେଳେ ବିଶ୍ୱସ୍ତ ସୁତ୍ରରୁ ଖବର ପାଇ ଅତିରିକ୍ତ ଏସପି ତେଜରାଜ ପଟେଲଙ୍କ ନେତୃତ୍ୱରେ ଡିଏସପି ପ୍ରବୀଣ ତ୍ରିପାଠୀ, ଇନ୍ସପେକ୍ଟର ଅଶୋକ କୁମାର ଗିରି, ସବଇନ୍ସପେକ୍ଟର ନଳୀନିକାନ୍ତ ଦାସ ପ୍ରମୁଖ ଚଢାଉରେ ଅଂଶଗ୍ରହଣ କରି ୯ଟି ଟ୍ରକ୍‌, ଗୋଟିଏ ଜେସିବି ସହ ୨୮୦ ଟନ୍‌ରୁ ଅଧିକ ପରିମାଣର ହାର୍ଡକୋକ୍‌ ଜବତ କରିଛନ୍ତି।  ୯ ଜଣ ଡ୍ରାଇଭର ଓ ୨ ଜଣ ବେପାରୀଙ୍କୁ ମିଶାଇ ୧୧ଜଣଙ୍କୁ ଚୌଦ୍ବାର ଥାନାରେ ଅଟକ ରଖି ପଚରାଉଚରା କରାଯାଉଛି। ଜବତ ଗାଡିଗୁଡିକୁ ଚୌଦ୍ୱାର ପୋଲିସକୁ ହସ୍ତାନ୍ତର କରିଛନ୍ତି।

ସୂଚନାଯୋଗ୍ୟ ଯେ ଶନିବାର ଅପରାହ୍ନରେ ଚୌଦ୍ବାର ଥାନା ଟିପିଏମ୍ ଫାଣ୍ତି ଅନ୍ତର୍ଗତ ନୂଆପାଟଣା ଛକ କଫି ବାର୍‌ ନିକଟସ୍ଥ ଶ୍ରୀରାମ ଫାଇନାନ୍‌ସ ପାଚେରି କଡ଼ରେ ଥିବା ଡିପୋରେ ଯାଜପୁର ଭିସା ଷ୍ଟିଲ୍‌ରୁ ହାର୍ଡ‌କୋକ୍‌ ଭର୍ତ୍ତି କରି ଆସିଥିବା ୯ଟି ୧୨-୧୪ଚକିଆ ଟ୍ରକ୍‌ ପାର୍କିଂ କରାଯାଇଥିଲା। ଟ୍ରକ୍‌ଗୁଡ଼ିକରୁ ହାର୍ଡକୋକ୍‌ କଞ୍ଚାମାଲ ବେଆଇନ ଭାବେ କଢ଼ାଯିବା ସମୟରେ ଏସ୍‌ଟିଏଫ୍ ଟିମ୍ ଚଢ଼ାଉ କରିଥିଲା। ଅତିରିକ୍ତ ଏସ୍‌ପି ତେଜରାଜ୍ ପଟେଲଙ୍କ ନେତୃତ୍ବରେ ଏସ୍‌ଟିଏଫ୍ ଟିମ୍ ଅପରାହ୍ନ ୨ଟାରୁ ଚଢ଼ା‌ଉ ଆରମ୍ଭ କରିଥିଲା ଯାହା ସଂଧ୍ୟା ପର୍ଯ୍ୟନ୍ତ ଜାରି ରହିଥିଲା। ଏହି ସମୟରେ ୯ଟି ଗାଡ଼ିରେ ବୋଝେଇ ହୋଇଥିବା କଞ୍ଚାମାଲକୁ ଛାଡ଼ି ୫୦ ଟନ୍‌ରୁ ଅଧିକ ଓଜନର କଞ୍ଚାମାଲ୍‌ ଡିପୋରେ ମହଜୁଦ ଥିବା ଦେଖାଯାଇଥିଲା। ଚଢ଼ାଉରେ ଏସ୍‌ଟିଏଫ୍ ଟିମ୍ ୨୮୦ ଟନ୍‌ରୁ ଅଧିକ ଓଜନର ହାର୍ଡକୋକ୍‌ ଜବତ କରିଥିଲା, ଯାହାର ମୂଲ୍ୟ ପାଖାପାଖି ୧କୋଟି ଟଙ୍କା ହେବ ବୋଲି ଅତିରିକ୍ତ ଏସ୍‌ପି ଶ୍ରୀ ପଟେଲ କହିଛନ୍ତି। 

ରାକେଟ୍‌ର ଚେର ଚଣ୍ତିଖୋଲ, ମଙ୍ଗୁଳି, ଚୌଦ୍ବାର, ଖୁଣ୍ଟୁଣୀରୁ ରାୟପୁର, ଭାଇଜାଗ୍, ଛତିଶଗଡ଼, ମହାରାଷ୍ଟ୍ର ରାଜ୍ୟକୁ ଲମ୍ବିଥିବା ଜଣାପଡ଼ିଛି। ଏହି ହାର୍ଡକୋକ୍ କଞ୍ଚାମାଲ ମାଇନିଂ ବିଭାଗ ଅଧୀନରେ ଆସୁ ନ ଥିବା ବେଳେ କଷ୍ଟମ୍ ଆଣ୍ତ ଏକ୍ସସାଇଜ୍ ଅଧୀନରେ ଆସୁଛି। ଫଳରେ ଚୋରା ବେପାରୀମାନେ ମାଇନିଂ ବିଭାଗକୁ ଚକ୍‌ମା ଦେଖାଇ ବେପାର କରିବାରେ ସକ୍ଷମ ହେଉଥିବା ବେଳେ ପରୋକ୍ଷରେ ସ୍ଥାନୀୟ ପୋଲିସ୍‌ ସେମାନଙ୍କୁ ସହାୟତା କରୁଥିବା ଚର୍ଚ୍ଚା ହେଉଛି। 

ଯାଜପୁରର ଭିସା କଂପାନିରୁ କ୍ରମାଗତ ଭାବେ ଏହି ହାର୍ଡକୋକ୍ ଛତିଶଗଡ଼ ଚାଲାଣ ହେଉଥିବା ବେଳେ ଚଣ୍ତିଖୋଲ, ଟାଙ୍ଗୀ, ମଙ୍ଗୁଳି, ନୂଆପାଟଣା ଓ ଖୁଣ୍ଟୁଣୀ ଅଞ୍ଚଳରେ ଗାଡ଼ିରୁ ମାଲ କଟିଙ୍ଗ୍ କରାଯାଉଥିବା ଅଭିଯୋଗ ହୋଇଛି। ଆଜି ଏସ୍‌ଟିଏଫ୍ ଟିମ୍ ଜବତ କରିଥିବା ସମସ୍ତ ୯ଟି ଗାଡ଼ି ସମେତ ୧୧ଜଣଙ୍କୁ ଚୌଦ୍ବାର ଥାନାରେ ଅଟକ ରଖିଥିବା ସୂଚନା ମିଳିଛି। ଚଢ଼ାଉରେ ଡିଏସ୍‌ପି ପ୍ରବୀଣ ଚନ୍ଦ୍ର ତ୍ରିପାଠୀ, ଇନସ୍‌ପେକ୍ଟର ଅଶୋକ କୁମାର ଗିରି, ଏସ୍‌ଆଇ ଏନ୍‌.କେ ଦାସ ପ୍ରମୁଖ ସାମିଲ ହୋଇଥିଲେ।

Edit by: ବର୍ଷା ମଲ୍ଲିକ